ԿԱՐՃԱՄԵՏՐԱԺ ՎԻԴԵՈՀՈԼՈՎԱԿՆԵՐԻ ՄՐՑՈՒՅԹ

«Ռեստարտ Գյումրի» երիտասարդական-քաղաքացիական կենտրոնը հայտարարում է կարճամետրաժ վիդեոաշխատանքների մրցույթ ՀՀ-ում բնակվող 16-30 տարեկան երիտասարդների համար։

Ունե՞ս գաղափար, տեսակետ, պատմություն կամ խնդիր, որի մասին ցանկանում ես, որ ավելի շատ մարդիկ խոսեն։ Վիդեոհոլովակների մրցույթը երիտասարդներին հնարավորություն է տալիս տեսանյութի միջոցով բարձրաձայնելու իրենց մտահոգությունները, ներկայացնելու գաղափարներն ու առաջարկները և խոսելու հասարակական, երիտասարդական, քաղաքացիական, մշակութային ու համայնքային արդիական թեմաների մասին։

Ովքե՞ր կարող են մասնակցել.

Մրցույթը բաց է 16–30 տարեկան Հայաստանի հանարապետությունում բնակվող երիտասարդների համար։ Հատկապես խրախուսվում է մարզաբնակ երիտասարդների մասնակցությունը։ Մասնակցել հնարավոր է ինչպես անհատապես, այնպես էլ փոքր ստեղծագործական խմբով։ Մասնագիտական տեսանկարահանման կամ մոնտաժի փորձ ունենալը պարտադիր չէ։ Առաջնային են գաղափարը, բովանդակությունը, ստեղծագործական մոտեցումը և այն ուղերձը, որը ցանկանում եք փոխանցել։

Թեմատիկ ուղղություններ.

Տեսանյութը կարող է անդրադառնալ, օրինակ՝

☑️ երիտասարդների մասնակցությանը կամ չմասնակցելուն հանրային և քաղաքական գործընթացներին,

☑️ կրթական համակարգի խնդիրներին և հնարավոր լուծումներին,

☑️ երիտասարդների և քաղաքականության փոխհարաբերությանը,

☑️ մշակութային և արվեստային ակտիվիզմին,

☑️ ապատեղեկատվության և մանիպուլյատիվ տեղեկատվության ազդեցությանը մարդկանց որոշումների ու հասարակության վրա,

☑️ ժողովրդավարական գործընթացներին և երիտասարդների մասնակցությանը Հայաստանում ու տարածաշրջանում,

☑️ մարդու իրավունքներին՝ հայաստանյան համատեքստում,

☑️ համայնքային խնդիրներին և դրանց հնարավոր լուծումներին,

☑️ երիտասարդներին վերաբերող այլ հասարակական խնդիրների։

Թվարկված ուղղությունները չեն սահմանափակում ստեղծագործական ընտրությունը։ Կարող եք ներկայացնել նաև հասարակական, քաղաքացիական, երիտասարդական, մշակութային, համայնքային կամ այլ հարակից թեմայով աշխատանք, եթե այն համապատասխանում է մրցույթի ընդհանուր նպատակներին։

Մրցույթի նպատակներն են՝

խթանել երիտասարդների քաղաքացիական և հասարակական մասնակցությունը,

ստեղծել ազատ ինքնարտահայտման և հանրային խոսքի հարթակ,

խրախուսել մեդիայի և ստեղծագործական միջոցների օգտագործումը հասարակական խնդիրների բարձրաձայնման համար,

զարգացնել երիտասարդների ստեղծագործական մտածողությունն ու մեդիաարտադրության հմտությունները,

ավելի լսելի դարձնել հատկապես մարզաբնակ երիտասարդների ձայնը։

Ներկայացվող աշխատանքի պահանջները՝

✔️ տևողություն՝ 2–10 րոպե,

✔️ֆորմատ՝ MP4,

✔️ լեզու՝ հայերեն կամ պարտադիր հայերեն ենթագրերով,

✔️ աշխատանքը պետք է լինի ամբողջական և մոնտաժված,

✔️ տեսապատկերի և ձայնի որակը պետք է բավարար լինի դիտման համար։

Տեսանյութը կարող է նկարահանվել ինչպես պրոֆեսիոնալ տեխնիկայով, այնպես էլ հեռախոսով։

Գնահատման ժամանակ առաջնային չի լինելու օգտագործված տեխնիկան։ Կարևորվելու են աշխատանքի գաղափարը, բովանդակությունը, ստեղծագործական լուծումը և հաղորդվող ուղերձը։

Տեսանյութին անհրաժեշտ է կցել մինչև 200 բառանոց նկարագրություն, որտեղ կներկայացվեն թեման, հիմնական գաղափարը, ստեղծագործական մոտեցումը և աշխատանքի գլխավոր ուղերձը։

Գնահատման չափանիշներ. Աշխատանքները կգնահատվեն հետևյալ չափանիշներով՝

✔️ թեմայի արդիականություն և մրցույթի նպատակներին համապատասխանություն, ✔️գաղափարի հստակություն և ինքնատիպություն,

✔️ բովանդակային խորություն,

✔️ ստեղծագործական մոտեցում,

✔️ հաղորդվող ուղերձի ուժ և հասկանալիություն,

✔️ իրականացման ընդհանուր որակ։

Բովանդակային սահմանափակումներ. Աշխատանքը չպետք է պարունակի՝

ատելության խոսք,

խտրականություն կամ որևէ անձի կամ խմբի նկատմամբ թշնամանքի խթանում,

բռնության խրախուսում կամ արդարացում,

մարդու արժանապատվությունը կամ իրավունքները ոտնահարող բովանդակություն,

անօրինական գործողությունների խրախուսում։

Հեղինակային և պատկերի օգտագործման իրավունքներ.

Մասնակիցը պետք է երաշխավորի, որ տեսանյութում օգտագործված երաժշտությունը, լուսանկարները, տեսանյութերը, գրաֆիկական նյութերը և այլ ստեղծագործական տարրերը չեն խախտում երրորդ անձանց հեղինակային կամ այլ իրավունքները։

Մրցույթի արդյունքները.

Ընտրված աշխատանքների հեղինակները կստանան հայերեն և անգլերեն հավաստագրեր, ինչպես նաև մրցույթի շրջանակում նախատեսված նվերներ։ Ժյուրիի կողմից ընտրված վիդեոաշխատանքները կհրապարակվեն «Ռեստարտ Գյումրի» երիտասարդական-քաղաքացիական կենտրոնի հաղորդակցման հարթակներում։

Դիմելու վերջնաժամկետ՝ ս.թ. հոկտեմբերի 20-ը՝ ներառյալ։

Վերջնաժամկետից հետո ներկայացված աշխատանքները չեն դիտարկվի։

Ինչպե՞ս ներկայացնել աշխատանքը.

Աշխատանքը և կից նյութերը անհրաժեշտ է ուղարկել՝ rg.ngo.restartlab@gmail.com նամակի Subject դաշտում նշել՝ «Վիդեոաշխատանքների մրցույթ և Անուն Ազգանուն»։ Նամակում անհրաժեշտ է ներառել՝

✅ մասնակցի անունը և ազգանունը,

✅ տարիքը,

✅ բնակության համայնքը,

✅ կոնտակտային տվյալները,

✅ կարճ կենսագրական տեղեկություն,

✅ տեսանյութի կարճ նկարագրությունը։

Եթե ֆայլի ծավալը թույլ չի տալիս այն ուղարկել էլեկտրոնային փոստով, կարելի է կցել Google Drive կամ այլ ֆայլային հարթակի հասանելի հղում։

Հարցերի և լրացուցիչ տեղեկությունների համար՝ +374 95 718191, կամ նամակ գրել հետևյալ էլ. հասցեին՝ mpetrosyan.restartgyumri@gmail.com։

Քո գաղափարը կարող է դառնալ պատմություն, որը կտեսնեն և կլսեն ուրիշները։ Ստեղծի՛ր, պատմի՛ր և բարձրաձայնի՛ր այն, ինչը կարևոր է քեզ համար։