ՇՊՀ-ի ՀԱՍՏԱՏՎԱԾ ՆՈՐ ԽՈՐՀՐԴԱՆԻՇՆԵՐԸ

Ավելի քան 2 տարի տևած երկար աշխատանքներից ու քննարկումներից հետո սույն թվականի հունիսի 19-ին ՇՊՀ-ի Գիտական խորհրդի կողմից հաստատվել են բուհի նոր խորհրդանիշները՝ Գերբն ու դրոշը (2 տարիների ընթացքում «Ռեստարտ Գյումրի» երիտասարդական-քաղաքացիական կենտրոն ՀԿ-ի մեդիա թիմի կողմից ստեղծվել են ՇՊՀ-ի Գերբի և դրոշի ավելի քան 10 տարբերակներ)։ Գերբի և դրոշի փոփոխությունը տեղի է ունեցել ՇՊՀ-ի ռեկտորի հասարակական հիմունքներով խորհրդական և ՇՊՀ-ի Հոգաբարձուների խորհրդի անդամ Գևորգ Ղուկասյանի առաջարկությամբ։ Այս առաջարկությունը պայմանավորված էր նրանով, որ նախկին Գերբը ընդհանրապես չէր համապատասխանում բուհական ձևաչափին, չուներ որևէ հիմնավոր բացատրություն և չէր արտացոլում ժամանակակից ակադեմիական հաստատությանը հարիր վիզուալ։ Իսկ դրոշ ընդհանրապես գոյություն չուներ։ ՇՊՀ-ի նոր Գերբի և դրոշի հեղինակը ևս Գևորգ Ղուկասյանն է, իսկ ծրագրային աշխատանքների պատասխանատուները «Ռեստարտ Գյումրի» երիտասարդական-քաղաքացիական կենտրոն ՀԿ-ի մեդիա թիմի աշխատակիցներ Լալա Մանուկյանը, Լիլիթ Պետրոսյանը և Նարե Սահակյանը։ ՇՊՀ-ի խորհրդանիշները ստեղծվել են համապատասխան գրաֆիկական կանոններով և ամբողջությամբ հեղինակային են։ Խորհրդանիշները ստեղծելիս ուսումնասիրվել են միջազգային շուրջ 100 համալսարանների խորհրդանիշներ (Հյուսիսային Ամերիկա, Արևելյան և Արևմտյան Եվրոպա, Թուրքիա, Վրաստան), դրանց կառուցվածքը, նկարագրությունը և այլն։ Խորհրդանիշները բուհի 90 – ամյակին ընդառաջ անհատույց նվեր են համալսարանին «Ռեստարտ Գյումրի» երիտասարդական-քաղաքացիական կենտրոն ՀԿ-ի կողմից։

ՇԻՐԱԿԻ ՊԵՏԱԿԱՆ ՀԱՄԱԼՍԱՐԱՆԻ ԳԵՐԲԻ ԴԵՏԱԼՆԵՐԻ ԲԱՑԱՏՐՈՒԹՅՈՒՆ

ՇՊՀ-ի Գերբը շրջանաձև է, գույները՝ ալ կարմիր և սպիտակ։ Խորհրդանիշի կենտրոնում պատկերված է Հայաստանի առաջին համալսարանի և ապա` Լենինականի մանկավարժական ինստիտուտի նախկին շենքը (ներկայում՝ Շիրակի պետական համալսարան)։ Առաջին համալսարանի և Լենինականի մանկավարժական ինստիտուտի շենքի ներկայությունը ՇՊՀ-ի Գերբի (և դրոշի) կենտրոնում խորհրդանշում է կրթությունը, դպրությունը, գիտելիքը, գիտությունը և այս ոլորտներում Հայաստանի առաջընթացի էության ու հայ ժողովրդի պատմության ամբողջ ընթացքում առաջին աշխարհիկ հեղինակավոր համալսարանը, որի լավագույն ավանդույթները հասել են մեզ։

ՇՊՀ-ի Գերբի կենտրոնում պատկերված առաջին համալսարանի շենքի ներքևում հիշատակված է 1934 թվականը։ Հենց այս տարեթվին է հիմնադրվել ՀՀ-ի ներկայիս մարզային ամենամեծ համալսարանը՝ ՇՊՀ-ն (նախկինում՝ Լենինականի մանկավարժական ինստիտուտ)։

ՇՊՀ-ի Գերբի ներքևում պատկերված է կիսաշրջանաձև ժապավեն։ Ժապավենի ձախ թևին գրված է ազատություն, աջ թևին՝ ազնվություն, իսկ մեջտեղում՝ ՇՊՀ-ն է։

Այս հատվածը խորհրդանշում է ակադեմիական ազնվությունը, հայ ժողովրդի անմար ձգտումը դեպի գիտելիքն ու կրթությունը և հավերժական պայքարը ազատության համար։ Համալսարանի առաքելությունն է ազատ մտածող, ազնիվ, բարեկիրթ, ստեղծագործ և նախաձեռնող քաղաքացի կերտելը։ Միայն ազատ մտածող մարդը կարող է ստեղծել հավելյալ արժեք պետության և հայրենիքի շենացման համար։

Այսպիսով՝ ՇՊՀ-ի Գերբը պարունակում է հետևյալ իմաստային և վիզուալ էլեմենտները.

1. Կրթության և գիտության մեկ կարևորագույն պատմական խորհրդանիշ՝ Հայաստանի առաջին համալսարանի և ապա Լենինականի նախկին մանկավարժական ինստիտուտի (ՇՊՀ-ի) շենքի գրաֆիկական պատկերը, որպես կրթության և գիտության օրրան,

2. Եվ մեկ կարգախոս ներքևի ժապավենի վրա՝ «Ազատություն և ազնվություն»։

ՇՊՀ-ի դրոշը ալ կարմիր և սպիտակ գույներով է, դրոշի կենտրոնում համալսարանի Գերբն է, որը գտնվում է ոսկեգույն նեղ գծերով ուղղանկյունու մեջ։

ՇՊՀ-ի Գերբը և դրոշը ստեղծվել են՝ ՇՊՀ-ի ռեկտորի խորհրդական, «Ռեստարտ Գյումրի» երիտասարդական կենտրոն ՀԿ-ի գործադիր տնօրեն Գևորգ Ղուկասյանի մտահղացմամբ և հեղինակությամբ։

ՇՊՀ-ի Գերբի և դրոշի ստեղծման աշխատանքների ղեկավար՝ Գևորգ Ղուկասյան
Գրաֆիկական և ծրագրային աշխատանքների պատասխանատուներ՝ Լալա Մանուկյան, Նարե Սահակյան, Լիլիթ Պետրոսյան։