Հայտարություն «Աղբի գործ»-ի վերաբերյալ

«Ընկերնե՛ր, այս գրառմամբ տեղեկացնում եմ, որ ս․թ․ հունվարի 20-ին նշանակվել է «աղբի» գործով հերթական դատական նիստը։ Վերջին անգամ դատական նիստ էր նշանակվել նախորդ տարվա սեպտեմբեր ամսին։ Դատական նիստերը նշանակվում են նույն տրամաբանությամբ՝ ձգձվելով, չհիմնավորված հետաձգումներով և երկարատև ընդմիջումներով։ Իսկ այդ ժամանակահատվածում դեռևս գործում է մեղադրյալների նկատմամբ խափանման միջոցի կիրառումը, ինչը էականորեն ազդում է մեր կյանքի բնականոն ընթացքի վրա։ Այս պայմաններում արդեն 2-րդ տարին է, ինչ մենք բախվում ենք իրավապահ համակարգի անգործությանը և արդարադատություն իրականացնող մարմինների խնդրահարույց գործելաոճին, որի արդյունքում տևական ժամանակ է, ինչ սահմանափակված են մեր իրավունքները։Մենք դատապարտում ենք դատաիրավական համակարգի, իրավապահ մարմինների անգործությունը և ընտրողական վերաբերմունքը։ Ընդգծում ենք՝ Ռեստարտ համայնքի ներկայացուցիչների խորին համոզմունք է, որ ատելության խոսքը՝ մասնավորապես սեռական բնույթի հայհոյանքները, տեղ չունեն հայ հասարակության մեջ, և վաղ թե ուշ դա գիտակցելու են բոլորը, իսկ այս ընթացքում մենք շարունակելու ենք ապրել և գործել մեր սկզբունքների և արժեքների համաձայն, պաշտպանելու ենք մեր և մեր հարազատների արժանապատվությունը և նրանց, ովքեր դրա կարիքը ունեն։

Հարգանքով՝ Դավիթ, Գարիկ, Արամայիս, Յուրի, Հրաչյա, Դավիթ»

Գարիկ Միսկարյանի ֆեյսբուքյան էջից